சூறாவளியின் தாக்கத்தால் இலங்கையில் கனமழை

இலங்கை

வங்காள விரிகுடாவின் கிழக்கு-மத்திய மற்றும் அதனை ஒட்டிய தென்கிழக்கு பகுதிகளில் நிலவிய காற்றழுத்த தாழ்வு மண்டலம், ஆழ்ந்த காற்றழுத்த தாழ்வு மண்டலமாக வலுவடைந்துள்ளது. 

இது தற்போது வட அகலாங்கு 15.3° இற்கும் கிழக்கு நெட்டாங்கு 89.7° இற்கும் அருகில் மையம் கொண்டுள்ளது. 

இந்த அமைப்பு தொடர்ந்து மேற்கு திசையை நோக்கி நகர்ந்து, இன்று (26) வங்காள விரிகுடாவின் கிழக்கு-மத்திய மற்றும் அதனை ஒட்டிய தென்கிழக்கு பகுதிகளில் சூறாவளியாக (cyclonic storm) வலுவடையக்கூடும். 

அதனைத் தொடர்ந்து, இது மேற்கு-வடமேற்கு திசையை நோக்கி நகர்ந்து, அக்டோபர் 27, அன்று வங்காள விரிகுடாவின் மேற்கு-மத்திய பகுதியில் தீவிர சூறாவளியாக (severe cyclonic storm) வலுவடைய வாய்ப்புள்ளது.

இந்த அமைப்பினால் இலங்கைக்கு நேரடி பாதிப்பு ஏதும் இருக்காது என்று எதிர்பார்க்கப்பட்டாலும், இதனுடன் தொடர்புடைய காற்று வீச்சு இலங்கையின் குறுக்கே செல்வதால், நாட்டின் தென்மேற்கு பகுதிகளில் வரும் நாட்களில் மழைப்பொழிவு அதிகரிக்கும் என்று எதிர்பார்க்கப்படுகிறது. இலங்கைசெய்திகள்

குறிப்பாக வடக்கு, மேல், சப்ரகமுவ, தெற்கு, வடமேற்கு, மத்திய மற்றும் வட-மத்திய மாகாணங்களிலும், திருகோணமலை மாவட்டத்திலும் அவ்வப்போது மழையோ அல்லது இடியுடன் கூடிய மழையோ பெய்யக்கூடும். 

இப்பகுதிகளில் சில இடங்களில் 100 மில்லி மீட்டருக்கும் அதிகமான பலத்த மழை பெய்ய வாய்ப்புள்ளது.

ஊவா மாகாணம் மற்றும் அம்பாறை, மட்டக்களப்பு மாவட்டங்களில், பிற்பகல் 1.00 மணிக்கு மேல் பல இடங்களில் மழையோ அல்லது இடியுடன் கூடிய மழையோ பெய்யக்கூடும்.

மத்திய மலைநாட்டின் மேற்கு சரிவுப் பகுதிகள், வடக்கு, வட-மத்திய மற்றும் வடமேற்கு மாகாணங்கள், அத்துடன் திருகோணமலை மற்றும் அம்பாந்தோட்டை மாவட்டங்களில் அவ்வப்போது மணிக்கு 40 முதல் 50 கிலோமீட்டர் வேகத்தில் பலத்த காற்று வீசக்கூடும்.

இடியுடன் கூடிய மழையின் போது ஏற்படும் தற்காலிக பலத்த காற்று மற்றும் மின்னல் தாக்கத்தினால் ஏற்படக்கூடிய பாதிப்புகளைக் குறைக்க, பொதுமக்கள் போதுமான முன்னெச்சரிக்கை நடவடிக்கைகளை மேற்கொள்ளுமாறு கேட்டுக்கொள்ளப்படுகிறார்கள்.

காற்று:

காற்று தென்மேற்கு திசையிலிருந்து வீசும்; காற்றின் வேகம் மணிக்கு 30 முதல் 40 கிலோமீட்டர் வரை இருக்கும்.

திருகோணமலையிலிருந்து காங்கேசன்துறை வழியாக மன்னார் வரையிலும், மற்றும் மாத்தறையிலிருந்து அம்பாந்தோட்டை வழியாக பொத்துவில் வரையிலும் உள்ள கடல் பகுதிகளில், அவ்வப்போது காற்றின் வேகம் மணிக்கு 60 முதல் 65 கிலோமீட்டர் வரை அதிகரிக்கக்கூடும்.

நாட்டைச் சுற்றியுள்ள ஏனைய கடல் பகுதிகளில், அவ்வப்போது காற்றின் வேகம் மணிக்கு 50 கிலோ மீட்டர் வரை அதிகரிக்கக்கூடும்.

கடல் நிலை:

திருகோணமலையிலிருந்து காங்கேசன்துறை வழியாக மன்னார் வரையிலும், மற்றும் மாத்தறையிலிருந்து அம்பாந்தோட்டை வழியாக பொத்துவில் வரையிலும் உள்ள கடல் பகுதிகள் அவ்வப்போது மிகவும் கொந்தளிப்பாகக் காணப்படும். 

நாட்டைச் சுற்றியுள்ள ஏனைய கடல் பகுதிகள் அவ்வப்போது கொந்தளிப்பாக இருக்கலாம்.

புத்தளத்திலிருந்து கொழும்பு, காலி மற்றும் மாத்தறை வழியாக பொத்துவில் வரையான கடல் பகுதிகளில், அலையின் உயரம் சுமார் 2.0 முதல் 2.5 மீட்டர்கள் வரை அதிகரிக்கக்கூடும்.

இடியுடன் கூடிய மழையின் போது, ​​தற்காலிகமாக பலத்த காற்று (மணிக்கு 60-70 கி.மீ வேகத்தில்) வீசக்கூடும் மற்றும் கடல் மிகவும் கொந்தளிப்பாகக் காணப்படலாம்.