அனோஜனுக்காக சவுதி அரேபியா செல்லவுள்ள நாடாளுமன்ற உறுப்பினர்கள் குழு

இலங்கை

புலம்பெயர் தொழிலாளி சிவராசா அனோஜனுக்கு விதிக்கப்பட்ட மரண தண்டனைக்கு எதிராக முறையிடும் வகையில் இலங்கை அரசாங்கம் அனுப்பும் கடிதத்தை கையளிக்க, பிரதி சபாநாயகர் ரிஸ்வி சாலிஹ் தலைமையிலான, ஆளும் மற்றும் எதிர்க்கட்சி நாடாளுமன்ற உறுப்பினர்களை உள்ளடக்கிய தூதுக்குழுவொன்று சவுதி அரேபியாவுக்குச் செல்லத் திட்டமிடப்பட்டுள்ளதாக வெளிவிவகார அமைச்சர் விஜித ஹேரத் இன்று நாடாளுமன்றத்தில் தெரிவித்தார். 

இது தொடர்பில் நாடாளுமன்றத்தில் விளக்கமளித்த அமைச்சர் விஜித ஹேரத், அடுத்த வாரம் நடைபெறவுள்ள ஐக்கிய நாடுகள் பொதுச் சபைக் கூட்டத்தின்போது சவுதி அரேபிய வெளியுறவு அமைச்சரைத் தான் நேரில் சந்திக்கவுள்ளதாகவும், அப்போது தண்டனைக்கு மன்னிப்பு அளித்தல், தண்டனைக் காலத்தைக் குறைத்தல் அல்லது ஏதேனும் சலுகையைப் பெற்றுத்தருதல் போன்ற மாற்று வழிகளை வலியுறுத்தவுள்ளதாகவும் தெரிவித்தார்.

சட்டரீதியான நடவடிக்கைகளை மேற்கொள்வதற்காக, சம்பந்தப்பட்ட சட்ட நிறுவனம் மற்றும் பிற அதிகாரிகளுடன் ஒருங்கிணைந்து செயல்பட, ஜனாதிபதி சட்டத்தரணிகளான உபுல் குமாரப்பெரும மற்றும் ஃபைசர் முஸ்தபா ஆகியோர் தங்கள் சொந்தச் செலவில் சவுதி அரேபியாவுக்குச் செல்ல ஒப்புக்கொண்டுள்ளதாகவும் அமைச்சர் மேலும் தெரிவித்தார்.

இதுவரையிலான அரசாங்கத்தின் நடவடிக்கைகளை விவரித்த அமைச்சர், ரியாத்தில் உள்ள இலங்கைத் தூதரகம் அனோஜனுடன் நேரடித் தொடர்பில் இருப்பதாகவும், தூதரக ஆதரவை வழங்கி வருவதாகவும், அதே நேரத்தில் சவுதி அரேபியாவில் உள்ள உயர் நீதிமன்றங்களுக்கு மேல்முறையீடு செய்வதற்கான சாத்தியமான வழிகள் குறித்து அறிக்கை அளிக்கும் பணியும் அதற்கு வழங்கப்பட்டுள்ளதாகவும் தெரிவித்தார்.

இந்த வழக்கு தொடர்பான தற்போதைய மற்றும் எதிர்காலச் செலவுகள் அனைத்தையும் அரசாங்கம் ஏற்கும் என உறுதியளித்துள்ளதாகவும், கொழும்பில் உள்ள சவுதி தூதரகத்துடன் இராஜதந்திரப் பேச்சுவார்த்தைகளைத் தொடர்வதாகவும் அவர் குறிப்பிட்டார். 

இதனிடையே, சவுதி அரேபியாவுக்குப் பயணம் செய்வதற்காக ஒரு சிறப்பு ஜனாதிபதி தூதுக்குழுவும் தயார் செய்யப்பட்டு வருகிறது.