காளிகாம்பாள் கோவிலில் 3 BHK படக்குழுவினர் சாமி தரிசனம்

சினிமா

சித்தார்த் 40-வது திரைப்படமாக 3 BHK திரைப்படத்தில் நடித்துள்ளார். 8 தோட்டாக்கள், குருதி ஆட்டம் போன்ற படங்களை இயக்கிய ஸ்ரீகணேஷ் இந்த படத்தை இயக்கியுள்ளார். இப்படத்தில் சித்தார்த்துக்கு ஜோடியாக சைத்ரா நடித்துள்ளார். அவருக்கு தங்கையாக மீதா ரகுநாத்தும் அப்பா அம்மாவாக சரத்குமார், தேவயாணியும் நடித்துள்ளனர். இப்படத்திற்கு பிரபல பாடகி பாம்பே ஜெயஸ்ரீயின் மகன் அம்ரித் ராம்நாத் இசையமைத்துள்ளார்.

இப்படம் 3 BHK வீடு வாங்க ஆசைப்படும் குடும்பத்தின் கதையாக உருவாகி உள்ளது. இதனை தொடர்ந்து, 3 BHK படம் நாளை திரையரங்குகளில் வெளியாக உள்ளது. இதற்கு முன்னதாக சிறப்பு காட்சி வெளியிடப்பட்டது. இப்படத்தை பார்த்த பிரபலங்கள் பலரும் பாராட்டி வருகின்றனர். இயக்குநர் ராம், ரவி மோகன், மாரி செல்வராஜ், நடிகர் சிம்பு உள்ளிட்ட திரைப்பிரபலங்கள் படக்குழுவினரை பாராட்டினர்.

இந்த நிலையில், 3 BHK படம் வெற்றிபெற வேண்டி பாரிமுனையில் உள்ள காளிகாம்பாள் கோவிலில் சரத்குமார், தேவயானி, சித்தார்த் உள்ளிட்ட படக்குழுவினர் சாமி தரிசனம் செய்தனர்.

இதன் பின் சரத்குமார் கூறுகையில், முயற்சி எடுக்கும்போது அந்த முயற்சி வெற்றிக்கரமாக இருக்கனும் என்று சொல்லி இறையருள் வேண்டுவது வழக்கம். அதே போல், வாசுதேவன் குடும்பத்திற்கு வெற்றி வரணும். படத்தில் நடிச்ச எல்லாருக்கும் வெற்றி கிடைக்கணும். படத்தை பார்த்தவர்கள் அளித்துள்ள விமர்சனம் பாசிட்டிவாக உள்ளது. உழைப்புக்கு வெற்றி கிடைக்கணும். நாங்கள் உழைத்துள்ளோம் என்றார்.