கியூபெக் - டொரொன்டோ அதிவேக ரயில் திட்டத்தால் 24.5 பில்லியன் வருமானம்
கனடா
கனடாவின் கியூபெக் சிட்டி மற்றும் டொரொன்டோ நகரங்களை இணைக்கும் வகையில் முன்மொழியப்பட்டுள்ள 'அல்டோ' அதிவேக ரயில் திட்டம், கனடாவின் பொருளாதாரத்திற்கு ஆண்டுதோறும் பில்லியன் கணக்கான டொலர்கள் ஊக்கத்தை அளிக்கும் எனப் புதிய ஆய்வு ஒன்று தெரிவித்துள்ளது.
அவிசியோ கான்செய்ல்' என்ற ஆலோசனை நிறுவனம் வெள்ளிக்கிழமை வெளியிட்டுள்ள ஆய்வறிக்கையில், இத்திட்டத்தின் மூலம் கனடாவின் மொத்த உள்நாட்டு உற்பத்தி ஆண்டுக்கு 24.5 பில்லியன் டொலர்களால் அதிகரிக்கும் எனக் குறிப்பிடப்பட்டுள்ளது.
சுமார் 1,000 கிலோமீற்றர் தூரத்தைக் கொண்ட இந்த அதிவேக ரயில் பாதை, கியூபெக் சிட்டியையும் டொரொன்டோவையும் 4 மணி 30 நிமிடங்களில் இணைக்கும். இடையிலே டிரோயிஸ்-ரிவியர்ஸ், லாவல், மொன்றியல், ஒட்டாவா மற்றும் பீட்டர்பரோ ஆகிய நகரங்களில் ரயில் நிலையங்கள் அமைக்கத் திட்டமிடப்பட்டுள்ளது.
இத்திட்டத்திற்கு 60 பில்லியன் முதல் 90 பில்லியன் டொலர்கள் வரை செலவாகும் என அரசாங்கம் மதிப்பிட்டுள்ளது.
கனடாவின் மக்கள் தொகையில் 41 சதவீதத்தினர் வசிக்கும் மற்றும் நாட்டின் மொத்த உள்நாட்டு உற்பத்தியில் 40 சதவீதத்தைப் பங்களிக்கும் கியூபெக் சிட்டி - டொரொன்டோ வழித்தடம் நாட்டின் பிரதான பொருளாதார மையமாகத் திகழ்வதாக இவ்வாய்வு சுட்டிக்காட்டியுள்ளது.
முக்கிய பொருளாதார மையங்களை விரைவாக இணைப்பதன் மூலம் நாட்டின் நீண்டகால உற்பத்தித்திறன் மற்றும் செழிப்பு வலுப்பெறும் என அவிசியோ நிறுவனத்தின் இணை நிறுவனர் ஜீன்-பியர் லெசார்ட் தெரிவித்துள்ளார்.
தற்போதுள்ள போக்குவரத்து கட்டமைப்புகளில் பயணிகள் பணம், நேரம் மற்றும் நம்பகத்தன்மை ஆகியவற்றில் பெரும் நெருக்கடிகளைச் சந்தித்து வருகின்றனர்.
விமானப் போக்குவரத்தில் போட்டித்தன்மை குறைவாக உள்ளதாகவும், 'வியா ரயில்' சேவைகள் சரக்கு ரயில்களுடன் தண்டவாளங்களைப் பகிர்ந்து கொள்வதால் தாமதங்களைச் சந்திப்பதாகவும் ஆய்வில் கூறப்பட்டுள்ளது.





















