ஒரே ஒரு வார்த்தை.. திரண்டுவந்த 50 லட்சம் பேர்.. அஞ்சும் அரசியல் கட்சிகள்

இலங்கை

நடிகர் விஜய்யின் அறிவிப்பு வெளியாகி ஒரு சில நாட்கள் முடிவடைந்த நிலையில், 50 லட்சம் பேர் அவரது தமிழக வெற்றிக் கழகத்தில் உறுப்பினர்களாக இணைந்துள்ளனர்.

நடிகர் விஜய் சொன்ன ஒற்றை வார்த்தைக்காக இரண்டே நாட்களில் 50 லட்சம் பேர் அவரது தமிழக வெற்றிக் கழகத்தில் இணைந்துள்ளனர். விஜய்க்கு இருக்கும் ஆதரவை பார்த்து தமிழகத்தில் உள்ள பெரிய கட்சிகளே சற்று நடுக்கத்தில் உள்ளதாக கூறப்படுகிறது.

நடிகர் விஜய் தமிழக வெற்றிக் கழகம் என்ற பெயரில் அரசியல் கட்சி தொடங்கியதில் இருந்தே அரசியல் களத்தில் ஒருவித பரபரப்பு நிலவி வருவதை யாரும் மறுக்க முடியாது. லட்சக்கணக்கான ரசிகர்கள் விஜய்க்கு பின்னால் இருப்பதால் அவரது அரசியல் வருகையை பார்த்து திமுக, அதிமுக போன்ற கட்சிகளே கலக்கம் அடைந்திருப்பதாக கூறப்படுகிறது.

இதனிடையே, வரும் நாடாளுமன்றத் தேர்தலில் தனது கட்சி போட்டியிடாது என்று அறிவித்த விஜய், 2026 சட்டமன்றத் தேர்தலில் களம் காண்பதாக தெரிவித்துள்ளார். இதனால் 2026 சட்டமன்றத் தேர்தல் தமிழகத்தில் ஒரு வித்தியாசமான தேர்தல் களமாக இருக்கும் என எதிர்பார்க்கலாம். ஏனெனில், கடந்த 70 ஆண்டுகாலமாக திமுக, அதிமுகவை தவிர மற்ற எந்தக் கட்சிகளும் களத்தில் இல்லை. கமலின் மக்கள் நீதி மய்யம் கடந்த 2021 சட்டமன்றத் தேர்தலுக்கு வந்து, அப்படியே காணாமல் போய்விட்டது.

இந்த சூழலில், விஜய்யின் அரசியல் வருகை ஒரு பெரிய மாற்றத்தை ஏற்படுத்தும் அரசியல் ஆர்வலர்கள் கூறி வருகின்றனர். இதற்கிடையே, நடிகர் விஜய் கடந்த 8-ம் தேதி தனது கட்சியில் உறுப்பினராக சேர்வதற்கான ஒரு செயலியை (APP) வெளியிட்டார். ஒரு வீடியோ மூலமாக இந்தக் கோரிக்கையை விஜய் விடுத்திருந்தார். அந்த வீடியோவில், "நான் தமிழக வெற்றிக் கழகத்தின் உறுப்பினர் அட்டையை எடுத்துவிட்டேன். பிறப்பொக்கும் எல்லா உயிர்க்கும் என்ற சமத்துவக் கொள்கையை பின்பற்றி, வரவுள்ள சட்டமன்றத் தேர்தலை சந்திக்கப் போகிறோம். எங்கள் கட்சியின் உறுதிமொழியை படிங்க. பிடித்திருந்தால் சேருங்கள்" எனக் கூறியிருந்தார்.

இந்நிலையில், விஜய்யின் அறிவிப்பு வெளியாகி இரண்டே நாட்கள் மட்டும் ஆகிய நிலையில், 50 லட்சம் பேர் தமிழக வெற்றிக் கழகத்தில் உறுப்பினர்களாக இணைந்துள்ளனர். அதாவது நேற்றைய நிலவரப்படி 25 லட்சம் பேரும், இன்றைக்கு மதியம் 1.30 மணி நிலவரப்படி 50 லட்சம் பேரும் தமிழக வெற்றிக் கழகத்தில் இணைந்துள்ளதாக அதிகாரப்பூர்வமாக தெரிவிக்கப்பட்டுள்ளது. 

அந்த வகையில் ஒரு புதிய கட்சிக்கு ஒரு சில நாட்களில் 50 லட்சம் பேர் இணைந்திருப்பது பெரிய பெரிய கட்சிகளையே வியப்படையச் செய்துள்ளது.