அமெரிக்காவில் கனடா குடிமக்கள் கைது மற்றும் தடுப்புக்காவல் 60% அதிகரிப்பு
கடந்த நிதியாண்டில் அமெரிக்காவில் கைது செய்யப்பட்ட அல்லது தடுப்புக் காவலில் வைக்கப்பட்ட கனடிய குடிமக்களின் எண்ணிக்கை முந்தைய ஆண்டை விட 60 சதவீதம் உயர்ந்துள்ளதாக கனடா உலக விவகாரங்கள் துறை வெளியிட்டுள்ள ஆண்டறிக்கையில் தெரிவிக்கப்பட்டுள்ளது.
2025 ஏப்ரல் முதல் 2026 மார்ச் வரையிலான காலகட்டத்தில் 577 கனடியர்கள் அமெரிக்காவில் கைது செய்யப்பட்டுள்ளனர் அல்லது காவலில் வைக்கப்பட்டுள்ளனர்.
அதற்கு முந்தைய ஆண்டில் இந்த எண்ணிக்கை 361 ஆக மட்டுமே இருந்தது. அதே காலகட்டத்தில், கனடியர்களின் அமெரிக்க வருகை 2.68 கோடியிலிருந்து 2 கோடியாக 25 சதவீதம் குறைந்துள்ளது.
இந்த அதிரடி உயர்வுக்குப் பின்னணியில் உள்ள துல்லியமான காரணங்களை வெளியுறவுத்துறை அறிக்கை வெளிப்படையாக விவரிக்கவில்லை. அமெரிக்க அதிபர் டொனால்ட் டிரம்ப் 2025 ஜனவரியில் மீண்டும் பதவியேற்றதைத் தொடர்ந்து, நாடு முழுவதும் சட்டவிரோதக் குடிவரவுக்கு எதிரான சோதனைகள் தீவிரப்படுத்தப்பட்டன.
இதன் விளைவாக, அமெரிக்க எல்லை அதிகாரிகளிடம் இருந்து கனடியர்கள் கடுமையான கேள்விகளை எதிர்கொள்வதாகவும், சிறிய விதிமீறல்களுக்காகவும் அவர்கள் தடுப்புக் காவலில் வைக்கப்படுவதாகவும் புகார்கள் எழுந்துள்ளன.
வாஷிங்டன் மாகாணத்தின் பிளெய்ன் பகுதியில் உள்ள குடிவரவுச் சட்டத்தரணி லென் சாண்டர்ஸ் இது குறித்துக் கூறியுள்ளார்.
பல கனடியர்கள் இந்தச் சட்ட அமலாக்க வலையில் சிக்கியுள்ளனர்.
இவர்கள் கனடாவில் இருந்து பொருட்கள் வாங்க வரும் பயணிகள் அல்ல; பல தசாப்தங்களாக அமெரிக்காவில் வாழ்ந்து, பணிபுரிந்து, கிரீன் கார்டு வைத்திருப்பவர்கள்.
தற்போது தங்கள் குடியுரிமை அந்தஸ்து குறித்து அவர்கள் பெரும் கவலையடைந்துள்ளனர் என தெரிவித்துள்ளார்.
