கனடாவின் நுளம்பினால் ஏற்படும் பாதிப்பு குறித்து எச்சரிக்கை

கனடா

கனடாவின் ஒன்டாரியோ மாகாணத்தில் உள்ள ஹமில்டன் நகரில் இந்த பருவத்திற்கான முதலாவது மனித வெஸ்ட் நைல் வைரஸ் தொற்று பதிவாகியுள்ளதை நகர சுகாதாரப் பிரிவு உறுதிப்படுத்தியுள்ளது.

இதனையடுத்து, இந்த வைரஸால் ஏற்படும் ஆபத்து மட்டத்தை 'மிதமான' நிலையிலிருந்து 'உயர்' நிலைக்கு நகர மருத்துவ சுகாதார அதிகாரி உயர்த்தியுள்ளார்.

வெஸ்ட் நைல் வைரஸால் பாதிக்கப்படுபவர்களில் சுமார் 80 சதவீதமானோருக்கு எந்தவித அறிகுறிகளும் தென்படுவதில்லை.

முதியவர்கள் மற்றும் நோய் எதிர்ப்பு சக்தி குறைந்தவர்களுக்குக் காய்ச்சல் ஏற்படலாம்; மேலும் சுமார் 1 சதவீதமானோருக்கு மூளை அல்லது மூளை உறையில் வீக்கம் போன்ற தீவிர பாதிப்புகள் ஏற்பட வாய்ப்புள்ளது.

தொற்றுள்ள கொசு கடித்த 2 முதல் 14 நாட்களுக்குள் இதற்கான அறிகுறிகள் வெளிப்படும்.

கொசுக்களின் எண்ணிக்கையைக் குறைக்கவும் நோய் பரவாமல் தடுக்கவும் வீதிகளிலுள்ள நீர் வடிநிலங்கள் மற்றும் பொது நிலங்களிலுள்ள நீர்நிலைகளில் 3ஆம் கட்ட லார்வா ஒழிப்பு மருந்துகள் தெளிக்கப்பட்டுள்ளன.

பொதுமக்கள் தங்களின் வீடுகள் மற்றும் தனியார் நிலங்களில் நீர் தேங்கி நிற்பதைத் தவிர்த்து, கொசுக்கள் பெருகுவதைத் தடுக்குமாறு சுகாதாரப் பிரிவு கேட்டுக்கொண்டுள்ளது.

இது தொடர்பான கூடுதல் தகவல்களை இணையத்தளத்திலோ அல்லது 905-546-2489 என்ற தொலைபேசி எண்ணை அழைப்பதன் மூலமோ பெறலாம்.