பிரித்தானியாவின் புகழ்பெற்ற கேப்டன் டாம் மூர் வீடு விற்பனை

மீன் குளத்துடன் கூடிய பிரம்மாண்டமான கேப்டன் டாம் மூர் வசித்த வீடு சுமார் £2.25 மில்லியனுக்கு விற்பனைக்கு வந்துள்ளது. கோவிட்-19 ஊரடங்கு சமயத்தில் நடைபயிற்சி மூலம் நிதி திரட்டி மக்கள் மனதில் இடம் பிடித்த கேப்டன் Tom Moore, வசித்த வீடு £2.25 மில்லியனுக்கு விற்பனைக்கு வந்துள்ளது.
  
இங்கிலாந்தின் பெட்ஃபோர்டுஷயர்(Bedfordshire), மார்ஸ்டன் மோரேடைன்(Marston Moretaine) என்ற இடத்தில் அமைந்துள்ள இந்த வீடு, கேப்டன் டாம் தனது தோட்டத்தில் 100 சுற்றுக்கள் நடந்து கிட்டத்தட்ட £39 மில்லியன் நிதி திரட்டியதற்கு சாட்சியாக இருந்தது.

தி மிரர் செய்தித்தாள் வெளியிட்டுள்ள தகவலின்படி, இந்த ஏழு படுக்கையறை கொண்ட வீட்டில், வளாகத்தை சுற்றி மீன்கள் நிறைந்த அகழி அமைந்துள்ளது, இது வீட்டிற்கு தனித்துவமான அழகை சேர்க்கிறது.

மேலும் சுவாரஸ்யமாக, இந்த விற்பனை பட்டியலில் கேப்டன் டாமின் சிலையும் இடம்பெற்றுள்ளதாக கூறப்படுகிறது. இது வீட்டின் சுவர்களில் பொதிந்துள்ள வரலாற்றின் நினைவூட்டலாக இருக்கும்.

இருப்பினும், இந்த விற்பனை சில சர்ச்சைகளையும் எதிர்கொண்டு வருகிறது. கேப்டன் டாமிற்கு மரியாதை செலுத்தும் விதமாக அனுமதியின்றி கட்டப்பட்ட ஸ்பா கட்டிடம் முன்னதாக இதே வளாகத்தில் இருந்தது.

கேப்டன் டாமின் பெயரை சுய லாபத்திற்காக குடும்பத்தினர் பயன்படுத்தியதாக எழுந்த கேள்விகளை தொடர்ந்து, 2024 பிப்ரவரியில் அந்த ஸ்பா கட்டிடம் இடிக்கப்பட்டது என்பது குறிப்பிடத்தக்கது.