அமெரிக்காவிடம் கனடா விடுத்துள்ள மிகப்பெரிய கோரிக்கை

கனடா, அமெரிக்கா மற்றும் மெக்சிகோ இடையிலான USMCA (United States-Mexico-Canada Agreement) சுதந்திர வர்த்தக ஒப்பந்தத்தை மேலும் 16 ஆண்டுகள் நீட்டிக்க வேண்டுமென அதிகாரப்பூர்வமாக கோரிக்கை விடுத்துள்ளது.

இது தொடர்பில், கனடாவின் வர்த்தக அமைச்சர் Dominic LeBlanc, அமெரிக்க வர்த்தக பிரதிநிதி Jamieson Greer மற்றும் மெக்சிகோ பொருளாதாரச் செயலாளர் Marcelo Ebrard ஆகியோருக்கு கடிதம் அனுப்பியுள்ளார்.

அந்தக் கடிதத்தில், “இந்த ஒப்பந்தம் மூன்று நாடுகளுக்கும், வட அமெரிக்க பொருளாதார ஒருங்கிணைப்புக்கும் மிகுந்த பயனுள்ளதாக உள்ளது” என தெரிவித்துள்ளார்.

மெக்சிகோவும் இதனை ஆதரித்து, 16 ஆண்டுகள் நீட்டிக்க விருப்பம் தெரிவித்துள்ளது.

ஒப்பந்தத்தின் அடுத்த மதிப்பாய்வு ஜூலை 2026-இல் நடைபெற உள்ளது. ஒப்பந்தம் நீட்டிக்கப்படாவிட்டால், அது 10 ஆண்டுகள் தொடரும். பின்னர் ஆண்டுதோறும் மதிப்பாய்வு செய்யப்படும்.

அமெரிக்கா, கனடாவுடன் சுமார் 30 வர்த்தக சிக்கல்கள் மற்றும் மெக்சிகோவுடன் 60 சிக்கல்கள் கொண்டுள்ளது. அதனால், ஒப்பந்தத்தை நீட்டிப்பதில் சில சவால்கள் இருக்கலாம் என கூறப்படுகிறது.

இந்நிலையில், அமெரிக்க ஜனாதிபதி டொனால்டு ட்ரம்ப், சமூக ஊடகத்தில் “Canada – 51st State!” என பதிவிட்டது கனடாவில் கடும் எதிர்ப்பை ஏற்படுத்தியுள்ளது.

கனேடிய பிரதமர் மார்க் கார்னி (Mark Carney), “அமெரிக்க நிர்வாகத்துடன் நாம் வேலை செய்ய வேண்டிய கட்டாயம் உள்ளது. ஆனால், கனடா எப்போதும் தனது சுயாட்சியை காக்கும்” என தெரிவித்துள்ளார்.

இந்த விவகாரம், வட அமெரிக்காவின் மூன்று நாடுகளின் பொருளாதார உறவுகளை மேலும் வலுப்படுத்தும் முக்கியமான கட்டமாகக் கருதப்படுகிறது.