அனைத்துலக நாணய நிதியத்திடம் சிறிலங்கா புதிய கடனைப் பெறுவதற்கான பேச்சுக்களை ஆரம்பித்துள்ளது. சிறிலங்காவுக்கு நிபந்தனை அடிப்படையில் வழங்க ஒப்புக்கொண்ட 2.6 பில்லியன் டொலர் கடனுதவியின் இறுதித் தொகுதியான 415 மில்லியன் டொலரை விடுவிக்க அனைத்துலக நாணய நிதியம் கடந்த வெள்ளிக்கிழமை இணக்கம் தெரிவித்திருந்தது. இதையடுத்தே புதிய கடனுதவி தொடர்பாக சிறிலங்கா அரசுடன் ஆரம்பக் கட்டப்பேச்சுக்கள் நடத்தப்பட்டுள்ளதாக அனைத்துலக நாணய நிதியத்தின் சிறிலங்காவுக்கான வதிவிடப் பிரதிநிதி கோசி மதாய் தெரிவித்துள்ளார்.

தற்போதைய கடன் திட்டம் முடிவடைந்ததும் நாட்டின் பொருளாதாரத்தை மேம்படுத்துவதற்கு அனைத்துலக நாணய நிதியத்திடம் புதிய கடனைக் கோரப்போவதாக, சிறிலங்கா மத்திய வங்கியின் ஆளுனர் அஜித் நிவாட் கப்ரால் கடந்தமாதம் தெரிவித்திருந்தார் என்பது குறிப்பிடத்தக்கது.